ടൂത്ത് ഫെയറി – 2

അങ്ങിനെ കഴിഞ്ഞ ബുധനാഴ്ച മകന്റെ അഞ്ചാമത്തെ പല്ലും കൊഴിഞ്ഞു.. കഴിഞ്ഞ നാല് പല്ലുകള്‍ക്കും ടൂത്ത് ഫെയറി മുടക്കം കൂടാതെ ഗിഫ്റ്റ് കൊടുത്തിരുന്നു… ടോയ് ലാപ്ടോപില്‍ തുടങ്ങി ടിപ്പറും, കാറും അവസാനം ബൈക്കും  ആയിരുന്നു ടൂത്ത് ഫെയറി സമ്മാനമായി നല്‍കിയത്… ഞാന്‍ കരുതിയിരുന്നത് ആദ്യത്തെ നാല് പല്ലുകള്‍ക്കേ ടൂത്ത് ഫെയറി ഗിഫ്റ്റ് കൊടുക്കൂ  എന്നായിരുന്നു.. നാലാമത്തെ പല്ല് കൊഴിഞ്ഞപ്പോള്‍ തന്നെ ഇത് മകനെ അറിയിച്ചതും ആണ്..  അങ്ങിനെ മകന്റെ പല്ല് കൊഴിയലിന്റെ കേസ്ഡയറിയില്‍ നിന്നും ടൂത്ത് ഫെയറിയെ വെട്ടികളഞ്ഞു സ്വസ്ഥമായി ഇരുന്നപ്പോഴാണ് അപ്രതീക്ഷിതമായി അഞ്ചാമത്തെ പല്ലിനു ആട്ടം തുടങ്ങിയത്…ചെറിയ ആട്ടം അല്ല… ഉഞ്ഞാല് പോലെ കിടന്നാടുന്നു..  അന്വേഷിച്ചപ്പോള്‍ ആട്ടം നേരുത്തേ തുടങ്ങിയതാ.. പക്ഷെ പയ്യന്‍സ് നമ്മളോട് മിണ്ടിയില്ല…. സഖിയോടു പറഞ്ഞിരിക്കുന്നു.. നാല് പല്ലിന്റെ ആട്ടത്തിനും …. അതിന്റെ പറിക്കലിനും..പറിക്കാന്‍ തുടങ്ങുമ്പോഴുള്ള മകന്റെ ഓട്ടത്തിനും.. ഒക്കെ മൂക സാക്ഷിയായ സഖിയും അഞ്ചാമത്തെ പല്ലിന്റെ ആട്ടം അത്ര ഗൌരവത്തില്‍ എടുത്തില്ല… അങ്ങിനെ ഇരുന്നപ്പോഴാണ് നാട്ടില്‍ നിന്നും കൊണ്ടുവന്ന പേരയ്ക്കാ മകന്‍ എടുത്തു കടിച്ചതും പല്ലിന്റെ പിടിവള്ളി പൊട്ടിയതും…  ആട്ടം തുടങ്ങിയതും.. അതും രാത്രിയില്‍ …

സ്ഥിരം പറയാറുള്ള പോലെ…  അച്ഛ പല്ലില്‍ തൊടില്ല.. പിടിക്കില്ല ..വേദനിപ്പിക്കില്ല…, പറിക്കില്ല…,  നോക്കട്ടെ എന്ന് ഒക്കെ പറഞ്ഞു മകനെ അടുത്ത് വിളിച്ചു.. നാല് പല്ലുകള്‍ പറിച്ചത് കാരണം ഒരു മാതിരി നമ്പറുകള്‍ ഒക്കെ മകന് അറിയാം.. പക്ഷെ അവനും ആഗ്രഹമുണ്ട് ഈ പല്ല് എങ്ങിനെ എങ്കിലും പറിക്കണമെന്ന്.. ഞാന്‍ വിളിച്ചപ്പോഴേക്കും പതിവ് പോലെ അവന്‍ ഓട്ടം ആരംഭിച്ചു.. അവസാനം അച്ഛ തൊടില്ല കുട്ടാ എന്ന് സഖിയും ഉറപ്പു കൊടുത്തപ്പോള്‍ മകന്‍ മടിച്ചു മടിച്ചു അടുത്ത് വന്നു.. ഇത്തവണ പുതിയ നമ്പര്‍ പ്രയോഗിച്ചു.. അവനോടു തന്നെ പല്ല് വിരല്‍ കൊണ്ട് താഴോട്ട് അമര്‍ത്താന്‍  പറഞ്ഞു.. മനസ്സില്ലാ മനസ്സോടെ അവന്‍ പല്ലില്‍ വിരല്‍ വെച്ച് താഴോട്ടു അമര്‍ത്തിയതും  … അവന്റെ കൈക്കിട്ടു ഞാന്‍ ഒരു തട്ട് കൊടുത്തതും… പല്ല് കൊഴിഞ്ഞതും.. അവന്‍ അയ്യടാ എന്നായതും… എല്ലാം ഞൊടിയിടയില്‍ കഴിഞ്ഞു..

പതിവുപോലെ പല്ല് കൊഴിഞ്ഞപ്പോള്‍ തന്നെ മകന്‍ ടൂത്ത് ഫെയറിയെ പറ്റി പറഞ്ഞു തുടങ്ങി.. ഇത്തവണ ഞാന്‍ അത് കൂടുതല്‍ പ്രോത്സാഹിപ്പിക്കാന്‍ നിന്നില്ല.. ആദ്യത്തെ നാല് പല്ലുകള്‍ക്കെ  പുള്ളിക്കാരി ഗിഫ്റ്റ് തരൂ എന്ന് ഞാന്‍ പണ്ടേ പറഞ്ഞതല്ലേ….തന്നെയുമല്ല സൈഡിലെ പല്ലുകള്‍ പുള്ളിക്കാരിക്കു ഇഷ്ടമല്ല എന്നൊക്കെ പറഞ്ഞു നോക്കി.. പക്ഷെ മകന്‍ വിട്ടില്ല… അവന്റെ ഏതോ ഒരു ഫ്രെണ്ടിനു അഞ്ചാമത്തെ പല്ലിനും ഗിഫ്റ്റ് കിട്ടി പോലും.. ഓ… ഈ ഫ്രെണ്ട്സിനെ കൊണ്ട് തോറ്റൂ…

കൊഴിഞ്ഞ പല്ല് കഴുകി വൃത്തിയാക്കി ഒരു പേപ്പറില്‍ പൊതിഞ്ഞു തലയണയുടെ അടിയില്‍ വച്ച് മകന്‍ ഉറങ്ങാന്‍ കിടന്നു.. ആദ്യത്തെ പല്ല് കൊഴിഞ്ഞപ്പോള്‍ രക്തത്തിന്റെ അംശം ഉള്ളത് കാരണം ടൂത്ത് ഫെയറി വരുമോ എന്നവന്‍ സംശയിച്ചിരുന്നു.. അത് കൊണ്ട് അതിനു ശേഷം കൊഴിഞ്ഞ പല്ലുകള്‍ വൃത്തിയായി കഴുകി പേപ്പറില്‍ പൊതിഞ്ഞു തലയണയുടെ അടിയില്‍  വെക്കുന്നതാ അവന്റെ  രീതി.. പാവം പയ്യന്‍സ്… ഇപ്പോഴും എല്ലാ ഗിഫ്റ്റുകളും ടൂത്ത് ഫെയറി തന്നെയാ കൊടുത്തിരിക്കുന്നത്‌ എന്ന് അവന്‍ ഉറച്ചു വിശ്വസിക്കുന്നു… പലരോടും വളരെ ആധികാരികമായി തന്നെ ടൂത്ത് ഫെയറിയെ പറ്റിയും പുള്ളിക്കാരി കൊടുത്ത ഗിഫ്റ്റിനെ പറ്റിയും പറഞ്ഞിട്ടുമുണ്ട്.. ഏതായാലും ഇത്തവണയും ടൂത്ത്ഫെയറി ഗിഫ്റ്റ് കൊടുക്കുമെന്ന പ്രതീക്ഷയില്‍ പഴയപോലെ കൂടുതല്‍ സംശയങ്ങള്‍ ഒന്നും ചോദിക്കാതെ അവന്‍ ഉറങ്ങി പോയി..

അവന്‍ ഉറങ്ങിയതോടെ പല്ലിന്റെയും ടൂത്ത് ഫെയറിയുടെയും ഗിഫ്റ്റിന്റെയും കാര്യം മറന്നു ഞങ്ങളും ഉറങ്ങാന്‍ കിടന്നു

************************************************

രാവിലെ സ്കൂളില്‍ പോകാനായി ഞാന്‍ മകനെ ഉണര്‍ത്താന്‍ ശ്രമം ആരംഭിച്ചു .. സാധാരണ ഉണര്‍ത്തുക എന്നത് ഒരു യജ്ഞമാണ്.. 6 30 നു വിളി തുടങ്ങിയാല്‍ 6 50 ആകും എണീക്കാന്‍ … പതിവിനു വിപരീതമായി ഒറ്റ തട്ടിന് തന്നെ അവന്‍ ചാടി എണീറ്റു..  എണീറ്റ്‌ വന്നതും തലയണ പൊക്കി നോക്കുന്നു…. മെത്ത പൊക്കി നോക്കുന്നു.. ബെഡ് ഷീറ്റും പുതപ്പും വലിച്ചു മാറ്റി നോക്കുന്നു .. ആകെ ഒരു ബഹളം .. എനിക്ക് കാര്യം ആദ്യം കത്തിയില്ല .. ഞാന്‍ ചോദിച്ചു എന്താ കുട്ടാ നീ ഈ കാട്ടുന്നത്?? എന്തിനാ ഷീറ്റും തലയണയും മെത്തയും ഒക്കെ മറിച്ചിടുന്നത് ?? അവന്റെ മുഖം ആകെ വിളറി.. ചുണ്ടുകള്‍ വിതുമ്പി.. എന്നെ വന്നു കെട്ടിപ്പിടിച്ചു വിതുമ്പി കൊണ്ട് പറഞ്ഞു .. അച്ചേ.. ടൂത്ത്ഫെയറി വന്നു പല്ല് എടുത്തുകൊണ്ടു പോയി.. പക്ഷെ ഗിഫ്റ്റ് തന്നില്ല… അപ്പോഴാ എന്നിക്ക് സംഗതി കത്തിയത്… ഗിഫ്റ്റിനു വേണ്ടിയുള്ള പരക്കം പാച്ചിലില്‍ പല്ലിന്റെ പൊതി അവന്‍ കണ്ടില്ല… ആദ്യം ചിരി വന്നെങ്കിലും ഞാനും അവന്റെ ദുഃഖത്തില്‍ പങ്കു ചേര്‍ന്നു.. അവനെ അടുത്ത് പിടിച്ചു ബെഡ് റൂമില്‍ നിന്നും വെളിയില്‍  കൊണ്ട് വന്നു.. അവനെ ആശ്വസിപ്പിക്കാന്‍ ശ്രമിച്ചു .. അവന്‍ വിതുമ്പി കൊണ്ടേ ഇരുന്നു…  ഗിഫ്റ്റ് ഒന്നും വച്ചില്ലല്ലോ എന്നാ നിരാശയില്‍ ഞാനും വിഷമിച്ചു….

ഇതൊക്കെ കണ്ടു കൊണ്ട് സഖി നില്‍ക്കുന്നുണ്ടായിരുന്നു.. പെട്ടന്ന് ഒരു 100 രൂപ എടുത്തു സഖി തലയണയുടെ കവറിലിട്ടു… ഷീറ്റിന്നടിയില്‍ നിന്നും പൊതിഞ്ഞു വച്ച പല്ലും കണ്ടെത്തി അവിടനിന്നും മാറ്റി.. ബെഡ് റൂമില്‍ നിന്നും മാറി ഞാനും ഇതൊക്കെ കാണുന്നുണ്ടായിരുന്നു… സഖിയില്‍ നിന്നും സംഗതി എല്ലാം ഒക്കെ ആയെന്ന സിഗ്നല്‍ കിട്ടിയപ്പോള്‍ ഞാന്‍ മകനോട്‌ ചോദിച്ചു..

കുട്ടാ.. നീ അവിടെ എല്ലാം നോക്കിയോ ?

മകന്‍ : നോക്കി.. ഒരിടത്തും ഇല്ല

ഞാന്‍ : പൊതിഞ്ഞു വച്ച പല്ല് അവിടെയുണ്ടോ ?

മകന്‍ : ഇല്ല .. ഞാന്‍ അവിടെല്ലാം നോക്കി.. കണ്ടില്ല.. അത് ടൂത്ത്ഫെയറി കൊണ്ടുപോയി…. ഉറപ്പാ.. (അവന്‍ അങ്ങിനെ തന്നെ ഉറച്ചു വിശ്വസിക്കുന്നു.. എന്ത് ചെയ്യാന്‍ പറ്റും )

ഞാന്‍ : കുഞ്ഞു പില്ലോ കവറില്‍ തപ്പിയോ? ചിലപ്പോള്‍ അതില്‍ കാണും..

മകന്‍ : ഇല്ല നോക്കിയില്ല.. ടൂത്ത്ഫെയറി പില്ലോ കവറില്‍ എങ്ങിനാ ഗിഫ്റ്റ് വെക്കുന്നത്.. ഞാന്‍ അതില്‍ കിടക്കുവല്ലായിരുന്നോ ?

ഞാന്‍ : കുട്ടാ , ടൂത്ത്  ഫെയറിക്ക് മെത്തയെന്നോ , പില്ലോയെന്നോ, പില്ലോ കവറെന്നോ….എന്നോന്നും വേര്‍തിരിവില്ല .. എവിടെ വേണമെങ്കിലും ഗിഫ്റ്റ് വെക്കും.. കുഞ്ഞു പോയി നോക്ക് .. ചിലപ്പോള്‍ കാണും..

മകന്‍ :   ഞാന്‍ നോക്കട്ടെ..

ഗിഫ്റ്റ് കിട്ടുമെന്ന പ്രതീക്ഷയോടെ അവന്‍ ബെഡ് റൂം ലക്ഷ്യമാക്കി നടന്നു… കട്ടിലിനരുകില്‍ ചെന്ന് പില്ലോ എടുത്തു.. പില്ലോ കവറിനുള്ളില്‍ പരതി നോക്കി.. എന്തോ അവന്റെ കയ്യില്‍ തടഞ്ഞിരിക്കുന്നു… അവന്റെ മുഖത്തെ ദുഃഖ ഭാവം മാറി.. കയ്യില്‍ തടഞ്ഞ 100 ന്റെ നോട്ട് അവന്‍ പയ്യെ പില്ലോ കവറില്‍ നിന്നും വലിച്ചെടുത്തു.. വിതുമ്പി കൊണ്ടിരുന്ന അവന്റെ ചുണ്ടുകളില്‍ പ്രസാദവും കരഞ്ഞു കലങ്ങിയ കണ്ണുകളില്‍ പ്രകാശവും ദൃശ്യമായി.. 100 ന്റെ നോട്ട് കണ്ടു അവന്‍ സന്തോഷത്തോടെ ഉച്ചത്തില്‍ പറഞ്ഞു… അച്ചേ,  ഇത്തവണ ടൂത്ത്ഫെയറി എനിക്ക് 100 രൂപയാ തന്നത്.. ചിലപ്പോള്‍ ടൂത്ത് ഫെയറിക്ക് ഗിഫ്റ്റ് മേടിക്കാന്‍ സമയം കിട്ടി കാണില്ല. അതുകൊണ്ടായിരിക്കും പൈസ വച്ചത്..

അവന്റെ സന്തോഷം കണ്ടപ്പോള്‍ എന്റെയും സഖിയുടെയും കണ്ണുകള്‍ നിറഞ്ഞു .. കുട്ടികളുടെ മോഹങ്ങളും.. സ്വപ്നങ്ങളും, പ്രതീക്ഷകളും, ചിന്തകളും … നമ്മള്‍ വിചാരിക്കുന്നതിലും എത്രയോ അപ്പുറത്താണ്… പല്ലുകൊഴിയാലും ഗിഫ്റ്റും ഒക്കെ ഈ ചെറുപ്രായത്തില്‍ അവര്‍ക്ക് ഉണ്ടാകുന്ന നല്ല അനുഭവങ്ങളല്ലേ… അടുത്ത പല്ല് കൊഴിയുമ്പോള്‍ അവന്റെ പ്രതീക്ഷക്കൊത്ത് ഉയരുമെന്ന് ഉറപ്പിച്ചുകൊണ്ട്‌ നിര്‍ത്തുന്നു …

ശുഭം !-