സ്വപ്നസംസാരം
ഉറക്കത്തില്‍ ഒരു തട്ടലും മുട്ടലും വല്ലാത്ത ഒരു ഒച്ചയും കേട്ട് ഞാന്‍ ഞെട്ടി ഉണര്‍ന്നു.. മകന്‍ എന്തോ ഉറക്കത്തില്‍ പറയുകയാണ്‌ .. സ്കൂള്‍ തുറന്നതിനു ശേഷം ദിവസവും വഴക്ക് പറഞ്ഞും വിരട്ടിയും ഒക്കയാണ് ഉറങ്ങാന്‍ കിടത്തുന്നത് .. ഇനി അതിന്റെ സൈഡ് ഇഫെക്ക്റ്റ്സ്സ് വല്ലതും…… മനസ്സൊന്നു പിടച്ചു ….. ചെവി വട്ടം പിടച്ചു ….പകുതി മയക്കത്തില്‍ കേട്ടതിതാണ്
ഐ ഡോണ്ട് ഗീവ് യു മൈ കാര്‍ ..
അവന്റെ ഏറ്റവും പ്രിയപ്പെട്ട കളിപ്പാട്ടമാണ് കാര്‍ … ആരെന്തു മേടിച്ചു കൊടുക്കാമെന്നു പറഞ്ഞാലും അത് അവസാനം അവന്‍ കാറിലെത്തും… ഇന്ത്യയില്‍ ഇറങ്ങിയ ഒരുമാതിരി എല്ലാ കാറിന്റെയും മോഡല്‍ അവന്‍ പലപ്പോഴായി എന്നെയും മറ്റു പലരെയും സ്വാധീനിച്ചു സ്വന്തമാക്കിയിട്ടുണ്ട്.. കാറുകളെ പറ്റി അത്യാവശ്യം നല്ല ധാരണയും അവനുണ്ട് .. പത്രങ്ങളില്‍ ആക്സിടെന്റ്റ് ആയി കിടക്കുന്ന കാറുകള്‍ ഏതാണെന്ന് നമ്മള്‍ക്ക് മനസ്സിലായില്ലെങ്കില്‍ അവനോടു ചോദിച്ചാല്‍ മതി. ഹെഡ് ലൈറ്റോ ടെയില്‍ ലാംപോ കണ്ടാല്‍ മതി, കിറു കൃത്യമായി കാറിന്റെ മോഡല്‍ ഏതാണെന്ന് അവന്‍ പറയും.. ഇങ്ങനെ എന്നെ രണ്ടു മൂന്നു തവണ അവന്‍ ഞെട്ടിചിട്ടുമുണ്ട് ….
അങ്ങിനെ കാറുമായി അടങ്ങാത്ത അഭിനിവേശം ഉള്ള അവന്റെ ഏതോ ഒരു കാര്‍ ഉറക്കത്തില്‍ ആരോ അടിച്ചോണ്ട് പോകാന്‍ വന്നതാണെന്ന് തോന്നുന്നു.. ഏതായാലും സംഗതി കലിപ്പാണ് …. പയ്യെ എണീറ്റ്‌ ലൈറ്റ് ഇട്ടു.. അപ്പോള്‍ കണ്ട കാഴ്ച പയ്യന്‍സ് കട്ടിലില്‍ അസ്വസ്ഥനായി കിടക്കുന്നതാണ്.. സംഗതി അവന്റെ കാറല്ലേ.. അപ്പോള്‍ കലിച്ചില്ലങ്കിലേ അതിശയമുള്ളൂ……
ഏതായാലും പയ്യന്‍സ് വിട്ടുകൊടുക്കുന്ന ഭാവമില്ല. കട്ടിലില്‍ കിടന്നു തിരിയുന്നു മറിയുന്നു..കയ്യിട്ടടിക്കുന്നു.. കാലിട്ടടിക്കുന്നു എന്ന് വേണ്ടാ വല്ലാത്ത പുകില് തന്നെ … തിരുന്തോരം ഭാഷയില്‍ പറഞ്ഞാല്‍ വല്ലാത്ത പൊളപ്പ് തന്നെ…..
സ്വന്തം മകന്‍ ആയി പോയില്ലേ അല്ലെങ്കില്‍ .. തള്ളേ.. ഇവന്‍ എന്തര് പൊളപ്പ് പൊളക്കുണത് എന്ന് ചോദിക്കാവാരുന്നു..
കുറെ നേരം ഈ കലാപരിപാടികള്‍ പാതി മയക്കത്തില്‍ വീക്ഷിച്ചു ഉറക്കത്തില്‍ നിന്നും ഒരു വിധം മുക്തനായി ഞാന്‍ പയ്യെ മകനെ തട്ടി..
ഞാന്‍: കുട്ടാ … എന്തുവാടാ പ്രശ്നം
മകന്‍: ഐ ടോള്‍ഡ്‌ യു .. ഐ ഡോണ്ട് ഗിവ് യു മൈ കാര്‍ ….
ഞാന്‍: വേണ്ട കുട്ടാ.. അച്ചക്ക് നിന്റെ കാറ് വേണ്ടാ.. പ്രശ്നം തീര്‍ന്നല്ലോ..
ചെറുക്കന്‍ വിടുന്ന മട്ടില്ല… വീണ്ടും പറഞ്ഞു .. ഐ ഡോണ്ട് ഗീവ് യു മൈ കാര്‍ …
ഞാന്‍ അവനെ ശക്തിയായി പിടിച്ചു കുലുക്കി… ഉറക്കെ വിളിച്ചു .. കുട്ടാ…..നിഞ്ചു കുട്ടാ…
സ്വപനത്തില്‍ നിന്നും ഉറക്കത്തില്‍ നിന്നും ഞെട്ടിയുണര്‍ന്നു അവന്‍ അമ്പരപ്പോടെ ചുറ്റും നോക്കി .. ഉണര്‍ന്നിരിക്കുന്ന എന്നെ അവന്‍ കണ്ടു …..
അടുത്തിരുന്നത് ഞാനാണെന്ന് മനസ്സിലായപ്പോള്‍ അവന്റെ നോട്ടത്തില്‍ ഒരു വല്ലാത്ത ദേഷ്യ ഭാവം…എന്നെ ദഹിപ്പിക്കുന്ന രീതിയുള്ള ഒരു നോട്ടം….
ഇറ്റാലിയന്‍ പട്ടാളക്കാര്‍ കേരള ഫിഷര്‍മാനെ കണ്ട ഒരു പ്രതീതി… കയ്യില്‍ തോക്കുണ്ടായിരുന്നെങ്കില്‍ വെടി വെച്ചിട്ടേനെ……
ഞാന്‍: കുട്ടാ, സത്യമായിട്ടും നിന്റെ കാര്‍ എനിക്ക് വേണ്ടാ കുട്ടാ..
വീണ്ടും എന്നെ ദഹിപ്പിക്കുന്ന അത്ര തീഷ്ണത ഉള്ള ഒരു നോട്ടം നോക്കി അവന്‍ തിരിഞ്ഞു കിടന്നുറങ്ങി..
സ്വപ്നം കണ്ടു സംസാരിക്കുന്നവരെ വിളിച്ചുണര്‍ത്തിയാല്‍ അവര്‍ക്ക് ഭയങ്കര ദേഷ്യമാണ്… ഇതുപോലെ പല സംഭവങ്ങള്‍ക്കും എന്റെയീ ചുരുങ്ങിയ ജീവിതത്തില്‍ ഞാന്‍ സാക്ഷിയായിട്ടുണ്ട്..
കോട്ടയത്തുകാരന്‍ ഒരു മോനാ മോഹന്‍ ജോര്‍ജ് കോളേജില്‍ എന്റെ സഹപാഠി ആയിരുന്നു.. ആറടി പൊക്കം മെലിഞ്ഞ ശരീര പ്രകൃതം. മുഖം കണ്ടാല്‍ അഞ്ചാം ക്ലാസ്സില്‍ പഠിക്കുന്ന ഒരു കുട്ടിയുടെ നിഷ്കളങ്കത…ചര്‍മ്മം കണ്ടാല്‍ പ്രായം തോന്നുകയേ ഇല്ല…പഠിക്കുന്ന കാലത്ത് സ്വന്തമായി ഒരു റൂം ഉണ്ടെങ്കിലും അവിടെ കിടക്കുന്നത് വല്ലപ്പോഴും മാത്രമാണ് … ഉറക്കത്തില്‍ സംസാരിക്കുക എന്നത് കക്ഷിയുടെ സ്ഥിരം ഹോബ്ബിയാണ്…
കോളേജില്‍ പഠനം തുടങ്ങി കുറച്ചു കാലം കഴിഞ്ഞപ്പോള്‍ ഞങ്ങളെ മൈക്രോ പ്രോസസ്സറിന്റെയും, പി സി ബി കളുടെയും, ഐ സി കളുടെയും ഇതുങ്ങളുടെ കാലുകളുടെയും, ഓരോ കാലിന്റെയും കലാ പരിപാടികളുടെയും… ഒക്കെ പുതിയ ഒരു ലോകത്തേക്ക് ഞങ്ങളുടെ അധ്യാപകര്‍ കൂട്ടികൊണ്ട് പോയി.. അങ്ങിനെ ഐ സി കളും അതിന്റെ കാലുകളുമായി മല്ലിട്ട് ജീവിച്ച കാലഘട്ടത്തില്‍ മിക്ക ദിവസങ്ങളിലും സജിയുടെ വീട്ടിലാണ് മോനാ ഉറങ്ങിയത് …. സജി വയനാട്ടുകാരനാണ്…. അഞ്ചേകാല്‍ അടി പൊക്കം… കുറുകിയ ശരീരം…. ദിലീപിന്റെ (സിനിമാ നടന്‍) സംസാര ശൈലി.. പോക്കമില്ലങ്കിലും ആരെയും കൂസില്ല.. ഉറച്ച മനസ്സ് …അതാ പ്രകൃതം.. അങ്ങിനെയുള്ള ആളാ സജി.. രാത്രിയില്‍ ആരോ പേടിച്ചു നിലവിളിക്കുന്ന ഒച്ച കേട്ട് സജി ഞെട്ടിയുണര്‍ന്നു…
അയ്യോ പാറ്റ… മൈക്രോ പ്രോസസ്സറില്‍ പാറ്റ….
ആരോ കിടന്നു അലറുകയാണ് … ഉറക്കത്തിന്റെ പിടിയില്‍ നിന്നും പൂര്‍ണമായും മുക്തനാകാത്ത സജിക്ക് സംഗതി എന്തുവാണെന്നു മനസ്സിലായില്ല .. അങ്ങിനെ സംശയിച്ചിരുന്നപ്പോള്‍ വീണ്ടും കേട്ടു…
അയ്യോ പാറ്റ… മൈക്രോ പ്രോസസ്സറില്‍ പാറ്റ….
സജി തപ്പി തടഞ്ഞു എണീറ്റ്‌ലൈറ്റ് ഓണാക്കി നോക്കിയപ്പോള്‍ വീണ്ടും……
അയ്യോ പാറ്റ… മൈക്രോ പ്രോസസ്സറില്‍ പാറ്റ….
മോനാ ഉറക്കത്തില്‍ മൊഴിയുകയാണ്… സജി കുറെ നേരം സംഗതി വീക്ഷിച്ചു.. മോനാ വീണ്ടും പുലമ്പി …അയ്യോ പാറ്റ… മൈക്രോ പ്രോസസ്സറില്‍ പാറ്റ.
സജിക്ക് കാര്യം മനസ്സിലായില്ല… ഇനി മൈക്രോ പ്രൊസസ്സര്‍ എന്നുദ്ദേശിച്ചത് വേറെ വല്ലതും ആണോ…. ഏതായാലും മോനയോട് ചോദിയ്ക്കാന്‍ തീരുമാനിച്ചു….
സജി: എവിടാടാ പാറ്റ ?
മോനാ: മൈക്രോ പ്രോസസ്സറിന്റെ നാലാമത്തെ ലെഗ്ഗില്‍ അവന്‍ ഒളിച്ചിരിക്കുവാ… (ഉള്ളടക്കം എന്നാ സിനിമയില്‍ ജഗതിയുടെ വയറ്റില്‍ കുതിര ഉണ്ടെന്നു പറയുന്ന മാതിരി)
ഏതായാലും സംഗതി യഥാര്‍ത്ഥ മൈക്രോ പ്രൊസസ്സര്‍ തന്നെ …. സജിക്ക് സമാധാനമായി …..
സജി: എടാ.. അതിനു നീ ബേജാറാവേണ്ട… ഞാന്‍ മൈക്രോപ്രൊസസ്സര്‍ അതിന്റെ ബോര്‍ഡില്‍ നിന്നും ഊരിയെടുക്കാം.. എന്നിട്ട് പാറ്റയെ അടിച്ചു കൊല്ലാം..
മോനാ: അയ്യോ വേണ്ടാ…. നിന്റെ കൈ മുറിയും.. ഐ സി പ്ലക്കര്‍ ഉപയോഗിക്കൂ… നിന്റെ കൈകള്‍ സംരക്ഷിക്കൂ… (സ്വപ്നത്തില്‍ ഒരു ഉപദേശം കൂടി …കൈ വിരലുകള്‍ക്കും ..ഐ സി ക്കും.. അതിന്റെ കാലുകള്‍ക്കും.. കേടു കൂടാതെ ഊരിയെടുക്കുന്ന ഒരു ഉപകരണമാണ് ഐ സി പ്ലക്കര്‍ )
സജിക്ക് പിടിച്ചു നില്‍ക്കാനായില്ല.. അവന്‍ ഉച്ചത്തില്‍ ചിരിച്ചു.. ചിരികേട്ട് മോനാ ഞെട്ടിയുണര്‍ന്നു…. സജിയെ തീഷ്ണമായ ഒരു നോട്ടം നോക്കി തലയുള്‍പ്പടെ മൂടിപ്പുതച്ചു തിരിഞ്ഞു കിടന്നുറങ്ങി ….. ഏതാണ്ട് അതെ നോട്ടം തന്നെയാണ് എന്റെ മകന്‍ എന്നെ നോക്കിയതും ..
മറ്റൊരവസരത്തില്‍ ഓള്‍ ഇന്ത്യ ടൂറിന്റെ ഭാഗമായി ഡല്‍ഹി, ആഗ്ര, നേപ്പാള്‍, കാട് മണ്ടു തുടങ്ങിയ സ്ഥലങ്ങളില്‍ പോയി മടങ്ങിയെത്തിയപ്പോള്‍ രാത്രിയില്‍ മോനാ കണ്ട സ്വപ്നം ഞെട്ടിപ്പിക്കുന്നതായിരുന്നു.. ഉറക്കത്തില്‍ അവന്‍ അലറി…
കാട് മണ്ടുവില്‍ കക്കൂസ് ദുരന്തം… ഒന്‍പതു പേര്‍ മരിച്ചു.. മുപ്പതു പേര്‍ ആശുപത്രിയില്‍ …. അന്നത്തെ സ്വപ്നത്തിനു സാക്ഷി രഞ്ജിത്ത് പോള്‍ ആയിരുന്നു …മോനയുടെ ഉറക്ക സംവാദത്തെ പറ്റി ബോധവാനായ രഞ്ജിത്തും വിട്ടുകൊടുത്തില്ല .. അവനും മോണയും തമ്മില്‍ ബാക്കിയുള്ള സംവാദത്തിന്റെ സഭ്യത നോക്കുമ്പോള്‍ ഇവിടെ പ്രതിപാദിക്കാന്‍ എന്റെ സംസാകാരം അനുവദിക്കാത്തത് കൊണ്ട് ഞാന്‍ അത് ചെയ്യുന്നില്ല.. എന്നാലും ക്ലൈമാക്സില്‍ രൂക്ഷമായ അതേ നോട്ടം തന്നെ രഞ്ജിത്തിനെ നോക്കി മോനാ തിരിഞ്ഞു കിടന്നുറങ്ങി….
മറ്റു ചിലര്‍ ഉറക്കത്തില്‍ സ്വപ്നം കണ്ടു വല്ലാതെ വൈലെന്റ്റ് ആകും…
ഞങ്ങള്‍ കോളേജ് ജീവിതം കഴിഞ്ഞു ജോലി അന്വേക്ഷിച്ച്‌ ബാംഗ്ലൂരില്‍ താമസമായി.. ശിവാജി നഗറിന് സമീപം റൂബിന്‍ ഹൌസ് എന്ന് പേരുള്ള ഒരു ലോഡ്ജിലാണ് മിക്കവരും… ഒരു റൂമില്‍ മൂന്നും നാലും പേരാണ് താമസം.. ഈ ലോഡ്ജിന്റെ നടത്തിപ്പുകാരന്‍ ഒരു സായിപ്പാണ്‌ … സായിപ്പിനെ സ്വന്തം ഗേള്‍ ഫ്രെണ്ടിനെക്കാള്‍ പ്രേമം പൂച്ചകളോട് ആണ് (എഴുപതു വയസ്സിനു മേല്‍ പ്രായമുണ്ടെങ്കിലും സ്വന്തമായി ഭാര്യ ഇല്ലായിരുന്നു.. പക്ഷെ ഒരു ഗേള്‍ ഫ്രെണ്ട് ഉണ്ടായിരുന്നു) .. ലോഡ്ജില്‍ ആകെ ഇരുപതു റൂമാണ് ഉള്ളത് … അതിന്റെ ഇരട്ടി പൂച്ചകളുണ്ട്..അവിടുത്തെ അന്തേവാസികളുടെ ഉറക്കത്തിന്റെ പല യാമങ്ങളും പൂച്ചകള്‍ പലരീതിയില്‍ കുളമാക്കിയിട്ടുമുണ്ട് …………
അങ്ങിനെ മൂന്നും നാലും പേരും കുറെ പൂച്ചകളും ഓക്കെ കൂടി സുഖമായി കഴിഞ്ഞു കൂടി ജോലി അന്വേക്ഷിച്ച്‌ നടക്കുന്ന കാലം… ചിര്‍ക്കൊക്കെ ജോലി കിട്ടി.. ഭൂരിപക്ഷം പേര്‍ക്കും ജോലി അന്വേക്ഷിച്ച്‌ തേരാ പാരാ നടപ്പ് തന്നെ ആയിരുന്നു പണി.. പലര്‍ക്കും സാമ്പത്തിക പരാധീനത ഉച്ചസ്ഥായിയില്‍ നില്‍ക്കുന്ന കാലം… വീട്ടില്‍ നിന്നും വീണ്ടും അക്കൗണ്ട്‌ ടോപ്‌ അപ്പ്‌ ചെയ്യിക്കാനുള്ള മടി കാരണം മുണ്ടും മുറുക്കി അഡ്ജസ്റ്റ് ചെയ്തു ജീവിക്കുന്നതിന്റെ ബുദ്ധിമുട്ട് ഒരു വശത്ത് ….. ജോലി കിട്ടാത്തതിലുള്ള വിഷമവും അമര്‍ഷവും മറു വശത്ത് …
അങ്ങിനെ എല്ലാം ഉള്ളിലൊതുക്കി കഴിഞ്ഞു കൂടുന്ന ഒരു ദിവസം രാത്രി, കവിളത്ത് ശക്തമായ ഒരു അടി കൊണ്ട് ഷിറാസ് ഞെട്ടിയുണര്‍ന്നു… (ഞങ്ങളുടെ ബാച്ചിലെ പൊതുവേ ശാന്ത സ്വഭാവക്കാരനും ശുദ്ധനും ആണ് ഷിറാസ് …. ആര്‍ക്കും ഷിറാസിനോട് എന്ത് സഹായവും അഭ്യര്‍ഥിക്കാം… ജീവനുണ്ടെങ്കില്‍ ഷിറാസ് ചെയ്തു കൊടുക്കും..ഷിറാസ് ആരോടും അറിഞ്ഞു കൊണ്ട് ഒരു വഴക്കിനും പോകാറില്ല ..) അങ്ങിനെയുള്ള ഷിറാസിനെയാണ് ഉറക്കത്തില്‍ ആരോ തല്ലിയത് ….. ഷിറാസ് ഞെട്ടി തരിച്ചു പോയി…
കവിളും തുടച്ചു തപ്പി തടഞ്ഞു ലൈറ്റ് ഇട്ടു നോക്കിയപ്പോള്‍ ബിജു കിടക്കിയില്‍ കിടന്നു ഞെളിപിരി കൊള്ളുന്നു… ബിജു പൊതുവേ പ്രശ്നകാരനല്ല ..ജെന്റില്‍മാന്‍ ആണ് … എപ്പോഴും ടിപ് ടോപ്‌ ആയട്ടെ നടക്കൂ.. ഇന്റര്‍വ്യൂ നു പോകുന്നതും …. ചായകുടിക്കാന്‍ പോകുന്നതും….. രണ്ടിന് പോകുന്നതും…… ഉറങ്ങുന്നതും……. എല്ലാം ഫുള്‍ സ്ലീവ്സും… പാന്റ്സും… ബെല്‍റ്റും ഒക്കെ അണിഞ്ഞു എക്സിക്യൂട്ടീവ് സ്റ്റൈലില്‍ തന്നെ.. അങ്ങിനെയുള്ള ജെന്റില്‍മാന്‍ ബിജുവാണ് ഷിറാസിനെ തല്ലിയത്.. കവിളിലെ വേദന ഒരു സൈഡില്‍ ……തല്ലിയത് ബിജുവാണെന്ന് അറിഞ്ഞപ്പോള്‍ ഉള്ള മാനസിക സങ്കര്‍ഷം മറു സൈഡില്‍ .. ഷിറാസിന് പിടിച്ചു നില്ക്കാന്‍ പറ്റിയില്ല.. തല്ലു കൊണ്ട കവിളിലൂടെ അശ്രു കണങ്ങള്‍ ധാര ധാരയായി ഒഴുകി …പരിഭവത്തോടെ ബിജുവിനെ തട്ടി ചോദിച്ചു…. എന്തിനാ എന്നെ തല്ലിയത് ??
ബിജു ഉറക്കത്തില്‍ ഷിറാസിന്റെ കഴുത്തില്‍ കുത്തി പിടിച്ചുകൊണ്ടു ചോദിച്ചു: ഇനി നീ ഓട്ടോ ചാര്‍ജ് കൂടുതല്‍ മേടിക്കും അല്ലേടാ ???
സംഭവ ദിവസം ബിജുവിന് ഇന്ദിരാ നഗറില്‍ എവിടെയോ ഒരു ഇന്റര്‍വ്യൂ ഉണ്ടായിരുന്നു .. അവിടെ പോകാന്‍ വിളിച്ച ഓട്ടോക്കാരന്‍ മുപ്പതു രൂപ മീറ്ററില്‍ കാണിച്ചപ്പോള്‍ അറുപതു രൂപ മേടിച്ചു.. കാര്യം അതാണ്‌.. സംഗതി ഷിറാസിനും അറിയാമായിരുന്നു…
ഷിറാസ്: ബിജൂ…ഇത് ഷിറാസ് ആണ്… ഒട്ടോക്കാരനല്ല… പിടി വിടൂ ബിജൂ …പ്ലീസ്….
ബിജു പിടി വിടുന്ന മട്ടില്ല.. ബിജു ഇപ്പോഴും ഉറക്കത്തില്‍ തന്നെ…
ഷിറാസ് പിന്നെയും കേണപേക്ഷിച്ചു.. ബിജു പിടി വിടാതെ പിറുപിറുത്തു കൊണ്ടേ ഇരുന്നു.. സംഭവം ആകെ കലിപ്പായി.. സംഗതി കേട്ട് അടുത്തുകിടന്ന കിഷോര്‍ ഉറക്കച്ചുവടോടെ ചാടി എണീറ്റു.. കിഷോര്‍ ആളൊരു സംഭവമാ.. ആറടി പൊക്കം.. ഉരുക്ക് പോലത്തെ ശരീരം.. കാട്ടാനയുടെ ശക്തി..ഒരു നാലഞ്ചു ആള്‍ക്കാര്‍ ഒരുമിച്ചു പിടിച്ചാല്‍ പോലും നില്‍ക്കില്ല.. അത്രയ്ക്ക് കരുത്താണ് കക്ഷിക്ക് …… ബിജുവും ഷിറാസും ഒക്കെ ജോലി അന്വേക്ഷിച്ച്‌ നടക്കുന്ന സമയത്ത് കിഷോര്‍ ഐ ബി എമ്മില്‍ ജോലിക്ക് കയറിയിരുന്നു… അങ്ങിനെ കമ്പ്യൂട്ടെറിന്റെയും, ബ്ലൂച്ചിപ്പിന്റെയും, കറങ്ങുന്ന കസേരകളുടെയും, ചല പില ചിലക്കുന്ന കന്നടക്കാരെന്റെയും ലോകത്ത് അര്‍ദ്ധരാത്രി വരെ പണിയെടുത്തു…. ബസ്സിലെ തള്ളും കൊണ്ട് വന്നു…. ക്ഷീണിച്ച് കിടന്നു ഉറങ്ങുമ്പോഴാണ് ബിജുവിന്റെ സ്വപ്നവും …. ഷിറാസിന്റെ കരച്ചിലും … അതിന്റെ പേരിലുള്ള പൊല്ലാപ്പും …..
കിഷോറിന് കലി അടക്കാനായില്ല… കിഷോര്‍ ബിജുവിനെ കട്ടിലില്‍ നിന്നും വലിച്ചു പൊക്കി.. ആ പിടി വലിയുടെ ആഘാതത്തില്‍ ബിജു ഞെട്ടിയുണര്‍ന്നു.. സംഗതി മനസ്സിലായ ബിജു കിഷോറിന് നേരെ രൂക്ഷമായ അതേ നോട്ടം നോക്കി വീണ്ടും കിടന്നു.. കിഷോര്‍ എണീക്കുന്നത് കണ്ടപ്പോള്‍ തന്നെ ഷിറാസ് ഞാനൊന്നും അറിഞ്ഞില്ലേ രാമനാരായണ എന്ന മട്ടില്‍ പുതപ്പെടുത്തു തലയും മൂടി കിടന്നു .. കിഷോര്‍ പിറുപിറുത്തു കൊണ്ട് ലൈറ്റും ഓഫ് ചെയ്തു വീടും ഉറങ്ങാന്‍ കിടന്നു.. എല്ലാവരും ഉറക്കം പിടിച്ചു വന്നപ്പ്പോള്‍ സായിപ്പിന്റെ പൂച്ച കട്ടിലിന്റെ അടിയിലിരുന്നു മ്യാവൂ എന്നലറിക്കരഞ്ഞു… ഏതായാലും മൂവരുടെയും അന്നത്തെ ഉറക്കം അവിടെ അവസാനിച്ചു ..
ഏതായാലും ഉറക്കത്തില്‍ സ്വപ്നം കണ്ടു സംസാരിക്കുന്നവരെയും പ്രതികരിക്കുന്നവരെയും തട്ടി ഉണര്‍ത്തിയാല്‍ … പ്രതികരണം അതി രൂക്ഷമായ ദഹിപ്പിക്കുന്ന ഒരു നോട്ടമാണെന്നു യാതൊരു സംശയവുമില്ല .. ഇനിയും ശേഷമുള്ള എന്റെ ജീവിതത്തില്‍ ഇതുപോലെ എത്ര സ്വപ്നങ്ങള്‍ക്ക് സാക്ഷിയാകണം എന്നറിഞ്ഞു കൂടാ… ഏതായാലും തല്ലു മേടിക്കാതിരുന്നാല്‍ മതി എന്ന് സ്വയം ആഗ്രഹിച്ചു കൊണ്ട് ഇനിയും എന്റെ ഉറക്കത്തെ തടസ്സപ്പെടുത്തുന്ന രീതിയില്‍ ആരും സ്വപ്നം കാണരുതേ എന്നും പ്രാര്‍ഥിച്ചു കൊണ്ട് നിര്‍ത്തുന്നു….
നന്ദി… നമസ്കാരം… !-
…
Nurungukal 